Darul-Ifta

الجواب و باللہ التوفیق: امام اعظم ابو حنیفہ رحمۃ اللہ علیہ کے مسلک کی وضاحت علامہ کاسانی رحمۃ اللہ علیہ نے بدائع الصنائع فی ترتیب الشرائع میں کی ہے کہ: اگر نمازی قرآن پاک دیکھ کر پڑھے تو امام ابوحنیفہ رحمہ اللہ کے نزدیک اس کی نماز فاسد ہوجائے گی امام صاحب ؒ کے نزدیک اس کی دو وجہ ہیں، ایک تو یہ کہ قرآن پاک کا اٹھانا، اوراق کا پلٹنا اور اس میں دیکھنا یہ مجموعہ نماز کی جنس سے خارج اور عمل کثیر ہے جس کی نماز میں کوئی گنجائش نہیں ہے؛ لہٰذا اس سے نماز فاسد ہوجائے گی دوسری وجہ یہ ہے کہ یہ نمازی قرآن پاک سے سیکھ رہا ہے اس لیے کہ قرآن پاک سے پڑھنے والے کو متعلّم کہا جاتا ہے تو یہ استاذ سے سیکھنے کے مترادف ہوگیا اور اس سے نماز فاسد ہوجاتی ہے اور اس علت کی بنیاد پر دونوں صورتیں مفسد ہوں گی خواہ قرآن اٹھاکر اوراق پلٹتا رہے خواہ قرآن سامنے رکھ کر بغیر اوراق کے پلٹے ہوئے پڑھے۔
’’لو قرأ المصلي من المصحف فصلاتہ فاسدۃ عند أبي حنیفۃ۔۔۔۔ ولأبي حنیفۃ طریقتان:إحداہما أن ما یوجد من حمل المصحف و تقلیب الأوراق والنظر فیہ أعمال کثیرۃ لیست من أعمال الصلاۃ، ولا حاجۃ إلی تحملہا في الصلاۃ فتفسد الصلاۃ والطریقۃ الثانیۃ : أن ہذا یلقن من المصحف فیکون تعلما منہ، ألا تری أن من یأخذ من المصحف یسمی متعلما فصار کما لو تعلم من معلم؛ وذا یفسد الصلاۃ کذا ھذا، وہذہ الطریقۃ لا توجب الفصل بین ما إذا کان حاملا للمصحف مقلبا للأوراق، وبین ما إذا کان موضوعا بین یدیہ ولا یقلب الأوراق۔‘‘(۱)
علامہ حصکفی رحمۃ اللہ علیہ نے لکھا ہے:
’’وذکروا لأبي حنیفۃ في علۃ الفساد وجہین : إحداہما أن حمل المصحف والنظر فیہ وتقلیب الأوراق عمل کثیر والثاني أنہ تلقن من المصحف فصار کما إذا تلقن من غیرہ، وعلی الثاني لا فرق بین الموضوع والمحمول عندہ، وعلی الأول افترقا وصحح الثاني في الکافي تبعاً لتصحیح السرخسي، وعلیہ لو لم یکن قادراً علی القراء ۃ إلا من المصحف فصلی بلا قراء ۃ ذکر الفضلي أنہا تجزیہ وصححہا في الظہیریۃ عدمہ والظاہر أنہ مفرع علی الوجہ الأول الضعیف بحر‘‘(۲)
جب کہ صاحبین رحمہا اللہ کا قول اس سلسلے میں یہ ہے کہ نماز تام ہوجائے گی لیکن تشبہ کی بنا پر مکروہ ہوگی اس لیے کہ اس میں اہل کتاب سے مشابہت ہے؛ اہل کتاب بھی نماز میں تورات اور انجیل دیکھ کر پڑھتے ہیں اور یہود کی مشابہت سے حدیث پاک میں منع کیا گیا ہے۔ جیسا کہ علامہ کاسانیؒ نے بدائع الصنائع فی ترتیب الشرائع میں لکھا ہے کہ: امام ابویوسفؒ ومحمدؒ کے نزدیک نماز تام ہوجائے گی مگر مکروہ ہوگی اس لیے کہ اس میں اہل کتاب سے مشابہت ہے۔
’’وعند أبي یوسف ومحمد تامۃ ویکرہ۔۔۔۔۔۔۔ وقال إلا أنہ یکرہ عندہما لأنہ تشبہ بأہل الکتاب‘‘(۳)
خلاصہ: مذکورہ تفصیل سے معلوم ہوا کہ امام ابو حنیفہ رحمۃ اللہ علیہ فسادِ نماز کے قائل ہیں، صاحبین رحمہما اللہ کراہت کے قائل ہیں؛ لہٰذا نماز میں قرآن کریم دیکھ کر پڑھنا مفسد نماز ہے، اس لیے کہ حالتِ نماز میں مصحف اٹھاکر قرأت کرنا رسول اللہ صلی اللہ علیہ وسلم کی حکم عدولی ہے۔ نبی اکرم صلی اللہ علیہ وسلم نے فرمایا: ’’صلوا کما رأیتموني أصلي‘‘(۱) نماز اسی طرح پڑھو جیسے مجھے پڑھتے ہوئے دیکھتے ہو۔
اور رسول اللہ صلی اللہ علیہ وسلم کا عمل و حکم دوران نماز ہاتھ کو باندھنے کا ہے جب کہ مصحف کو اٹھانے والا رسول اللہ صلی اللہ علیہ وسلم کے اس حکم کی مخالفت کرتے ہوئے اپنے دائیں ہاتھ کو بائیں پر رکھنے کی بجائے ہاتھ میں مصحف تھامے رکھتا ہے۔ رسول اللہ صلی اللہ علیہ وسلم کے عمل کوسیدنا وائل بن حجر رضی اللہ عنہ نقل کرتے ہوئے فرماتے ہیں:
’’ثم وضع یدہ الیمنی علی الیسری‘‘(۲) پھر آپ نے اپنا دایاں ہاتھ بائیں پر رکھا۔ اور حکم کو نقل کرتے ہوئے سیدنا سہل بن سعد بن مالک رضی اللہ عنہ فرماتے ہیں کہ: لوگوں کو حکم دیا جاتا تھا کہ آدمی اپنا دایاں ہاتھ اپنی بائیں ذراع پر رکھے۔
’’کان الناس یؤمرون أن یضع الرجل الیدالیمنیٰ علی ذراعہ الیسریٰ فی الصلاۃ‘‘(۳)
مذکورہ روایات کی روشنی میں یہ بات واضح ہو جاتی ہے کہ جنہوں نے آپ کو مسئلہ بتایا ہے وہ صحیح ہے اور حنفی مسلک میں قرآن کریم دیکھ کر پڑھنے سے نماز فاسد ہو جاتی ہے، صاحبین رحمہما اللہ اگرچہ کراہت کے قائل ہیں؛ لیکن مفتی بہ قول امام اعظم ابو حنیفہ رحمۃ اللہ علیہ کا ہے۔

(۱) الکاساني، بدائع الصنائع في ترتیب الشرائع، ’’ فصل: وأما بیان حکم الاستخلاف‘‘: ج ۱، ص: ۵۴۳)۔
(۲) الحصکفي، الدر المختار مع رد المحتار، ’’فروع سمع المصلی إسم اللّٰہ تعالیٰ‘‘: ج ۱، ص: ۶۲۴)۔
(۳) الکاساني، بدائع الصنائع في ترتیب الشرائع، ’’فصل وأما بیان حکم الاستخلاف‘‘: ج ۱، ص: ۵۴۳)۔
(۱) أخرجہ البخاري، في صحیحہ، ’’کتاب الأذان، باب الأذان للمسافر، ج۱، ص۸۸، رقم۶۳۱)۔
(۲) أخرجہ مسلم، في صحیحہ، ’’کتاب الصلاۃ: باب وضع یدہ الیمنی علی الیسری بعد تکبیرۃ الإحرام‘‘: ج۱، ص:۱۷۳، رقم: ۴۰۱)۔
(۳) أخرجہ البخاري، في صحیحہ، ’’کتاب الأذان: باب وضع الیمنی علی الیسری في الصلاۃ‘‘: ج ۱، ص: ۱۰۲، رقم: ۷۴۰)۔

فتاوی دارالعلوم وقف دیوبند ج6 ص76

1 Answer